香港外交情况一览

　　香港外交係由中华人民共和国中央人民政府负责,香港政府无权过问。中央政府喺香港特区设有「中华人民共和国外交部驻香港特别行政区特派员公署」,负责处理同香港有关嘅外交问题。宜家好多国家喺香港都设有领事馆,而招待佢哋嘅工作就由政府总部礼宾处负责。

　　中华人民共和国驻香港特别行政区特派员公署

　　中华人民共和国外交部驻香港特别行政区特派员公署,简称「外交部驻港特派员公署」,係中央政府喺香港特区行使外交权力嘅机构。根据佢哋个网站话,特派员公署主要嘅工作包括：

　　帮特区官员用中国政府代表团成员嘅身份参加只係畀主权国家参加嘅国际会议。

　　授权特区政府同外边谈判同埋缔结双边协定。

　　处理外国喺香港成立领事馆嘅问题,帮特区政府争取其他国家畀特区护照免签证,颁发各类签证同证件。

　　转达关于外国领导人、大粒佬、专机或者军机、军用船隻嚟香港访问嘅问题,受理外国要喺港设立通信系统嘅问题。

　　发佈同中国外交或者香港有关嘅外交事务新闻,审批外国记者返内地嘅申请,同埋审批香港记者跟国家领导人出访嘅问题。

　　对一般人嚟讲,特派员公署对日常生活最紧要嘅职责就係批外籍人士返内地嘅签证,同埋帮内地或者台湾人搞出国、或者台胞返内地嘅手续。

　　外籍人士同内地、台湾、澳门人嚟香港同喺香港住嘅签证係由香港特区政府入境事务处负责,而香港永久居民返内地嘅通行证正常都係由中旅社批。呢啲工作都唔驶由特派员公署做。

　　做过公署特派员嘅有：

　　第一任　马毓真　(1997年7月至2001年3月)

　　第二任　吉佩定　(2001年3月至2003年7月)

　　第叁任　杨文昌　(2003年7月至2006年)

　　第四任　吕新华　(2006年至2012年)

　　第五任　宋　哲　(2012年至今)

　　外国驻港领事馆

　　根据香港特区政府礼宾处网站嘅资料,直到2005年5月13日为止,一共有56个国家喺香港开咗总领事馆,有55个国家喺香港开咗名誉领事馆。

　　係香港开咗总领事馆嘅国家有：

　　亚洲

　　孟加拉国　柬埔寨　朝鲜民主主义人民共和国　印度　印度尼西亚　伊朗　以色列　日本　哈萨克斯坦　韩国　科威特　老挝　马来西亚　缅甸　尼泊尔　巴基斯坦　菲律宾　沙特阿拉伯　新加坡　泰国　土耳其　阿拉伯联合酋长国　越南

　　欧洲

　　奥地利　比利时　捷克共和国　丹麦　芬兰　法国　德国　希腊　匈牙利　意大利　荷兰　波兰　罗马尼亚　俄罗斯　西班牙　瑞典　瑞士　英国

　　非洲

　　埃及　尼日利亚　南非

　　美洲

　　阿根廷　巴西　加拿大　智利　哥伦比亚　墨西哥　秘鲁　美国　委内瑞拉

　　大洋洲

　　澳大利亚　新西兰

　　係香港开咗名誉领事馆嘅国家有：

　　亚洲

　　巴林　不丹　塞浦路斯　约旦　马尔代夫　蒙古　阿曼　斯里兰卡

　　欧洲

　　阿尔巴尼亚　克罗地亚　冰岛　爱尔兰　拉脱维亚　立陶宛　卢森堡　马耳他　摩纳哥　斯洛伐克共和国　斯洛文尼亚　乌克兰

　　非洲

　　贝宁　喀麦隆　中非共和国　刚果　刚果民主共和国　科特迪瓦　赤道几内亚　埃塞俄比亚　加蓬　加纳　几内亚　肯尼亚　莱索托　马达加斯加　马里　毛里求斯　摩洛哥　莫桑比克　纳米比亚　尼日尔　塞舌尔　坦桑尼亚联合共和国　多哥　突尼斯　乌干达

　　美洲

　　巴巴多斯　古巴　牙买加　苏里南　特立尼达和多巴哥　乌拉圭

　　大洋洲

　　斐济　巴布亚新几内亚　萨摩亚　汤加

　　另外仲有5个官方认可代表机构：

　　国际清算银行亚太区办事处

　　欧洲联盟欧洲委员会香港办事处

　　国际金融公司东亚及太平洋地区办事处及世界银行东亚及太平洋地区私营发展部办事处

　　国际货币基金组织香港特别行政区分处

　　联合国难民事务高级专员署香港办事处

　　外国领导人访港期间,主要嘅礼节事宜由香港特区礼宾处安排。

　　香港居民喺内地同海外嘅保护

　　喺一国两制下,香港同内地并冇领事保护嘅问题;但因为香港居民嘅身份証明文件都係香港特区政府管同签发,内地部门同香港对应嘅部门冇任何统属关係,所以香港特区政府喺北京开咗个驻京办事处,里面有个入境事务处驻北京办事处,为香港居民提供协助,根据入境事务处网页嘅资料,佢嘅服务包括：

　　发入境许可证俾唔见咗证件嘅香港居民。(内地嘅出境许可由国内公安局签发。)

　　如果有乜嘢严重意外或者伤亡,帮当事人通知香港亲友同提供谘询意见。

　　应当事人要求联络香港亲友提供紧急金钱援助。

　　如果香港居民喺内地被拘捕,应当事人香港亲友要求向内地执法机关了解情况或提供律师资料。

　　香港永久居民主要都係中国籍人士,但亦都有大批外国籍人士--包括归化外籍嘅华裔香港人。所以香港居民喺海外嘅领事保护就比较复杂。一般嚟讲,当地中国大使馆或领事馆会向中国籍人士(包括攞外国护照而又未申报国籍变更嘅中国籍香港居民)提供保护,而外籍人士就由佢嗰个国嘅籍国家提供保护。不过,呢个标準亦有漏洞。用2004年印度洋大地震做例子：嗰阵时係香港圣诞节长假,所以有大批香港居民喺各个唔同东南亚国家,佢哋当中有中国籍,亦有外国籍嘅香港居民。当时唔少外籍香港居民需要联络喺香港嘅亲友,或者需要返香港,但又唔见晒返香港所需要嘅钱同埋证件,甚至有罹难人士需要办认係咪香港居民,呢啲都係当地中国领事馆、或者外籍香港居民嗰个国籍嘅领事馆一时难以代办嘅事项,搞到呢班香港居民陷入孤立无援嘅境地。结果喺灾后一个礼拜内,香港特区政府派出一支145人嘅队伍去最多香港人嘅泰国灾区成立支援中心,负责搵失踪港人下落、补办证件、提供应急金钱、核对同办认身份,安排罹难者家属认尸等。宜家特区政府入境事务处考虑紧设立一条支援热线,帮境外港人提供全球支援服务,保障港人喺海外嘅人身安全。